विश्वको प्रत्येक जीव आनन्द नै चाहन्छ भन्ने कुरा हामी सबैलाई थाहै छ, तर त्यो आनन्द भनेको के हो ? कहाँ छ ? र कसरी प्राप्त हुन सक्छ ? इत्यादि सबै प्रश्नहरूको सही-सही उत्तर नजान्नाले सबै जीव त्यस आनन्दबाट वञ्चित भइरहेका छन् । हिन्दू धर्मग्रन्थहरूमा अनेक धर्माचार्यहरूले आफ्ना आफ्ना अनुभवका आधारमा अनेक ग्रन्थहरू लेखे जसमा परस्पर विरोधाभासजस्तो देखिएको छ । पाठकहरू ती ग्रन्थ पढेर कुनै निर्णयमा पुग्न सक्तैनन् र झन बढी संशयमा पर्न सक्छन्।

प्रेम रस सिद्धान्त ग्रन्थको प्रमुख विशेषता के हो भने यसले सुन्दर एवं सरल भाषामा ती समस्त विरोधी सिद्धान्तहरूको समन्वय गरिदिएको छ। आचार्यवरले वेद र शास्त्रहरूका प्रमाणका अतिरिक्त दैनिक अनुभवका समेत उदाहरणहरूद्वारा सर्वसाधारणको लाभलाई दृष्टिगत गर्दै विषयहरूको निरूपण गर्नुभएको छ। हुन त ज्ञानको कुनै पनि सीमा हुँदैन तैपनि यस सानो ग्रन्थमा जीवको चरम लक्ष्य, जीव, माया तथा भगवान्‌को स्वरूप, महापुरुष- परिचय, कर्म, ज्ञान, भक्ति, साधना आदिको निरूपण गरिएको छ जसलाई जनसाधारणले सजिलै बुझ्न सक्छन्, साथै समस्त शंकाहरूको निवारण पनि गर्न सक्छन्।

आचार्यवर कुनै सम्प्रदाय - विशेषसँग सम्बद्ध हुनुहुन्न । अतएव उहाँको यस ग्रन्थमा सबै आचार्यहरुको सम्मान गरिएको छ। यसमा निराकार, साकार ब्रह्म एवं अवताररहस्यको प्रतिपादन त अनुपमेय नै छ । अन्तमा कर्मयोगसम्बन्धी प्रतिपादनमाथि पनि विशेष जोड दिइएको छ, किनकि सम्पूर्ण सांसारिक कार्यहरु गर्दै संसारी व्यक्तिले आफ्नो लक्ष्य प्राप्त गर्नु नै छ। यस ग्रन्थका विषयमा के नै समालोचना गर्नु छ र ? बस्, 'गागर में सागर' भनेझैं यसमा सम्पूर्ण तत्त्वज्ञान भरिएको छ । जसको भाँडा-बर्तन जति ठूलो होला उसले त्यति नै धेरै लाभ लिन सक्ला । पाठकहरूसित यति नै निवेदन छ कि एकपटक यो ग्रन्थ अवश्य पढ्नुहोला।